لیاری عمارت حادثہ، زندہ بچ جانے والی خاتون کے اہم انکشافات

کراچی میں لیاری کے علاقے بغدادی میں تین روز قبل زمین بوس ہونے والی پانچ منزلہ رہائشی عمارت کے حادثے میں جاں بحق افراد کی تعداد 28 ہوگئی جبکہ ریسکیو آپریشن بھی ختم کرلیا گیا ہے۔

حادثے میں جاں بحق ہونے والوں میں سے 17 کا تعلق ہندو کمیونٹی سے ہے جبکہ اس عمارت کے بیشتر وہ رہائشی زندہ بچے جو صبح اپنے کاموں یا گھر سے باہر نکلے تھے۔

تاہم ان میں ایک سندھیا نامی خاتون بچی جنہیں ملبے سے زخمی حالت میں نکالا گیا اور وہ سول اسپتال کراچی میں زیر علاج ہیں۔

سندھیا نے بتایا کہ صبح ساڑھے دس بجے کے وقت عمارت دو بار ہلی اور شدید جھٹکا محسوس ہوا تھا، اس کے بعد ہم باہر آگئے تھے۔ 

انہوں نے بتایا کہ پھر تھوڑی دیر بعد ہم سامان اکھٹا کرنے پہنچے تو میں اندر ہی تھی اور پھر مجھے کچھ یاد نہیں، جب ہوش آیا تو اسپتال میں تھی۔

ایک اور عینی شاہد نے بتایا کہ عمارت چند سیکنڈ کے اندر منہدم ہوئی اور پھر ریسکیو کاموں میں تاخیر کی وجہ سے اموات میں اضافہ ہوا۔