پاکستان کی جانب سے سیز فائر کیخلاف ورزی اور غزہ پر اسرائیلی حملوں کی شدید مذمت

پاکستان نے بدھ کے روز غزہ میں اسرائیلی افواج کے تازہ حملوں کی سخت مذمت کی ہے جن میں متعدد فلسطینی شہری جاں بحق اور زخمی ہوئے۔ دفتر خارجہ نے ان حملوں کو بین الاقوامی قانون اور حال ہی میں طے پانے والے امن معاہدے کی کھلی خلاف ورزی قرار دیا ہے۔

دفتر خارجہ کی جانب سے جاری بیان میں کہا گیا ہے کہ اسرائیلی قابض افواج کی جانب سے کی گئی نئی جارحیت "بین الاقوامی قوانین کی صریح اور سنگین خلاف ورزی" ہے جو خطے میں پائیدار امن اور استحکام کے لیے جاری عالمی کوششوں کو نقصان پہنچا سکتی ہے۔

پاکستان نے عالمی برادری پر زور دیا کہ وہ اسرائیل کی جانب سے جنگ بندی کی خلاف ورزیوں کو روکنے کے لیے فوری اور مؤثر اقدامات کرے اور غزہ میں بے گناہ شہریوں کے تحفظ کو یقینی بنائے۔

بیان میں پاکستان نے فلسطین کے مسئلے پر اپنی دیرینہ اور اصولی پوزیشن کو دہراتے ہوئے کہا کہ پاکستان ایک آزاد، خودمختار، قابلِ عمل اور جغرافیائی طور پر متصل ریاستِ فلسطین کے قیام کی حمایت کرتا ہے، جو جون 1967 سے قبل کی سرحدوں پر قائم ہو اور جس کا دارالحکومت القدس الشریف ہو۔

دفتر خارجہ نے عالمی طاقتوں پر زور دیا کہ وہ فلسطینی عوام کے خلاف اسرائیلی مظالم بند کرانے کے لیے اپنا مؤثر کردار ادا کریں تاکہ مشرقِ وسطیٰ میں حقیقی امن کی راہ ہموار ہو سکے۔