پنجاب حکومت نے اپنے وسائل سے طیارہ خریدا، رانا ثنا اللہ کا دفاع

وزیراعظم کے مشیر برائے سیاسی امور رانا ثناء اللہ خان نے حکومت پنجاب کی جانب سے نئے طیارے کی خریداری کے فیصلے کا دفاع کرتے ہوئے کہا ہے کہ اس معاملے کو بلاوجہ سیاسی رنگ دیا جا رہا ہے۔

سینیٹ کے اجلاس میں اظہار خیال کرتے ہوئے انہوں نے کہا کہ یہ تاثر درست نہیں کہ طیارہ صرف وزیر اعلیٰ مریم نواز کے ذاتی استعمال کے لیے خریدا جا رہا ہے۔ ان کا کہنا تھا کہ بعض عناصر اس معاملے کو محض پروپیگنڈے کے لیے اچھال رہے ہیں، حالانکہ پنجاب ایک بڑا صوبہ ہے اور اس کے پاس ایسے وسائل موجود ہیں کہ وہ اپنی ضرورت کے مطابق طیارہ خرید سکے۔

رانا ثناء اللہ نے وضاحت کی کہ نیا طیارہ کسی ایک شخصیت کے لیے نہیں بلکہ صوبے کا سرکاری اثاثہ ہوگا۔ انہوں نے بتایا کہ موجودہ سرکاری طیارہ تقریباً 25 سے 30 سال سے استعمال میں ہے اور اب اس کی جگہ نئے طیارے کی ضرورت ہے، جبکہ نیا طیارہ آئندہ 30 سے 40 سال تک قابل استعمال رہے گا۔

یہ وضاحت ایک ایسے وقت میں سامنے آئی ہے جب حکومت پنجاب کی جانب سے مبینہ طور پر 38 سے 42 ملین ڈالر مالیت کا جدید گلف اسٹریم بزنس جیٹ خریدنے پر سیاسی حلقوں میں شدید تنقید کی جا رہی ہے۔

دوسری جانب اپوزیشن جماعت پاکستان تحریک انصاف نے الزام عائد کیا ہے کہ طیارہ صرف وزیر اعلیٰ کے ذاتی استعمال کے لیے خریدا جا رہا ہے، جس پر حکومت اور اپوزیشن کے درمیان بیان بازی کا سلسلہ جاری ہے۔