صدر کے اعتراض کے باوجود قومی اسمبلی کا اجلاس کل طلب

قومی اسمبلی سیکریٹریٹ نے نومنتخب اراکین کی حلف برداری کے لیے اجلاس کل طلب کرلیا۔

صدر مملکت کے آئینی اعتراض کے باوجود وزیراعظم نے وزارت پارلیمانی امور اور وزارت قانون سے آئینی اور قانونی مشاورت کے بعد اجلاس بلانے کی منظوری دی۔

وزیراعظم انوار الحق کاکڑ نے آئین کے آرٹیکل 91 کی شق 2 کے تحت اجلاس بلانے کی منظوری دی جس کے بعد قومی اسمبلی سیکریٹریٹ نے اعلامیہ جاری کردیا۔

اعلامیے کے مطابق قومی اسمبلی کا اجلاس کل صبح 10 بجے ہوگا جس میں اراکین اپنے عہدوں کا حلف اٹھائیں گے اور راجہ پرویز اشرف اُن سے حلف لیں گے، اس کے بعد اسپیکر اور ڈپٹی اسپیکر کے انتخاب اور پھر مرحلہ وار وزیراعظم کا چناؤ کیا جائے گا۔