اسلام آباد ہائیکورٹ نے عمران خان اور بشری بی بی کی درخواست پر عائد اعتراضات ختم جردیے

اسلام آباد ہائی کورٹ نے توشہ خانہ کیس میں سزاؤں کے خلاف دائر اپیلوں پر رجسٹرار آفس کے تمام اعتراضات ختم کرتے ہوئے بانی پی ٹی آئی عمران خان اور ان کی اہلیہ بشریٰ بی بی کی اپیلوں کو باقاعدہ سماعت کے لیے مقرر کرنے کا حکم دے دیا۔

جمعرات کو کیس کی سماعت جسٹس خادم حسین سومرو نے کی، جس دوران عمران خان کے وکلا بیرسٹر سلمان صفدر اور سلمان اکرم راجہ عدالت میں پیش ہوئے جبکہ عمران خان کی بہنیں بھی کمرہ عدالت میں موجود تھیں۔

سماعت کے دوران بیرسٹر سلمان صفدر نے مؤقف اختیار کیا کہ اپیلیں دائر کرتے وقت رجسٹرار آفس کی جانب سے لگائے گئے اعتراضات کے بارے میں آگاہ نہیں کیا گیا تھا۔ بعد میں معلوم ہوا کہ مختلف تکنیکی بنیادوں پر اعتراضات عائد کیے گئے ہیں، جن میں وکالت نامے کی مدت اور دستاویزات کی ترتیب شامل تھی۔

عدالت نے درخواستوں پر فیصلہ سناتے ہوئے دونوں اپیلوں پر موجود اعتراضات ختم کرنے کی اجازت دے دی اور باقی اعتراضات دور کرنے کے لیے سات دن کی مہلت بھی دے دی۔ عدالت نے عمران خان اور بشریٰ بی بی کی متفرق درخواستیں بھی منظور کرلیں۔

سماعت کے موقع پر جسٹس خادم حسین سومرو نے ریمارکس دیے کہ دونوں درخواستیں منظور ہوچکی ہیں اور فریقین کو ریلیف دیا گیا ہے۔

یاد رہے کہ گزشتہ سال دسمبر میں احتساب عدالت نے توشہ خانہ ٹو کیس میں عمران خان اور بشریٰ بی بی کو 17،17 سال قید کی سزا سنائی تھی۔ کیس میں الزام تھا کہ سعودی عرب کے دورے کے دوران ملنے والے قیمتی زیورات کو قواعد کے خلاف اپنے پاس رکھا گیا۔

اب عدالت کی جانب سے اعتراضات ختم ہونے کے بعد اپیلوں پر باقاعدہ سماعت کا راستہ ہموار ہوگیا ہے۔