صوبوں میں پیکا ایکٹ کے تحت 372 غیر قانونی مقدمات کا انکشاف

قائمہ کمیٹی برائے اطلاعات و نشریات کے اجلاس میں یہ حیران کن انکشاف ہوا ہے کہ پیکا ایکٹ میں تازہ ترین ترمیم کے باوجود صوبوں میں شہریوں کے خلاف 372 غیر قانونی مقدمات درج کیے گئے ہیں۔

کمیٹی کے اراکین نے اس معاملے پر تشویش کا اظہار کرتے ہوئے کہا کہ اب ان مقدمات کا کیا ہو گا، جو کہ قانون کی خلاف ورزی کرتے ہوئے درج کیے گئے ہیں۔

اس کے بعد قائمہ کمیٹی نے ان غیر قانونی مقدمات کی تحقیقات کے لیے ایک ذیلی کمیٹی تشکیل دے دی ہے۔

اجلاس میں صحافیوں کے خلاف پیکا ایکٹ کے تحت درج مقدمات کی تفصیلات بھی پیش کی گئیں۔ حکام وزارت اطلاعات نے بتایا کہ اسلام آباد میں کل 19 مقدمات درج کیے گئے ہیں، جن میں سے ایک بھی مقدمہ کسی صحافی کے خلاف نہیں ہے۔

این سی سی آئی اے نے اب تک کل 1214 مقدمات درج کیے ہیں، جن میں سے 10 مقدمات صحافیوں کے خلاف ہیں۔

حکام کے مطابق، پیکا ایکٹ میں حالیہ ترامیم کے بعد صوبے براہ راست مقدمات درج نہیں کر سکتے۔ اگر صوبوں میں کوئی مقدمہ درج ہوتا ہے تو اسے وفاقی ایجنسی، این سی سی آئی اے، کو منتقل کرنا لازمی ہے۔

اسلام آباد میں درج ہونے والے 19 مقدمات میں کوئی گرفتاری عمل میں نہیں آئی ہے۔