سیکیورٹی فورسز کی کارروائی میں پانچ بھارتی حمایت یافتہ خوارج ہلاک

پشاور/شمالی وزیرستان: سیکیورٹی فورسز نے 15 اور 16 جون کی درمیانی شب فتنہ الخوارج کے گروپ کے خلاف کارروائی کر کے پانچ خوارج کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق خیبر پختونخوا میں بھارتی حمایت یافتہ "فتنہ الخوارج" گروپ کے خلاف دو انٹیلی جنس بیسڈ آپریشنز کامیابی سے مکمل کیے، جن کے نتیجے میں 5 دہشت گرد ہلاک ہوئے۔  

پشاور میں انٹیلی جنس کی بنیاد پر کیے گئے آپریشن میں 4 دہشت گرد مارے گئے، جن میں خارجی حارث اور خارجی بصیر شامل تھے۔  

ہلاک شدہ دہشت گردوں سے اسلحہ، گولیاں اور دھماکہ خیز مواد برآمد ہوا۔  یہ عناصر ملک میں دہشت گردی کی متعدد وارداتوں میں ملوث تھے۔  

شمالی وزیرستان میں ہونے والے دوسرے آپریشن میں ایک اور خارجی مارا گیا۔  سیکیورٹی فورسز نے علاقے میں مزید ممکنہ دہشت گردوں کی تلاش کے لیے کلئیرنس آپریشن بھی جاری رکھا۔  

آئی ایس پی آر نے اپنے بیان میں کہا کہ "پاکستانی سیکیورٹی فورسز ملک سے بھارتی سپانسرڈ دہشت گردی کا خاتمہ کرنے کے لیے پرعزم ہیں۔"

انہوں نے زور دیا کہ پاکستان کسی بھی بیرونی امداد یافتہ دہشت گرد گروپ کو برداشت نہیں کرے گا۔