ای چالان پر کراچی والوں کو بڑا ریلیف ملنے کا امکان

کراچی میں ٹریفک نظام اور ای چالان سسٹم کی کارکردگی کا جائزہ لینے کے لیے صوبائی وزیر داخلہ ضیا الحسن لنجار کی زیر صدارت ایک اعلیٰ سطح کمیٹی تشکیل دے دی گئی ہے، جس میں حکومت اور اپوزیشن دونوں کے نمائندے شامل ہیں۔

محکمہ داخلہ سندھ کی جانب سے جاری نوٹیفکیشن کے مطابق کمیٹی کو شہر میں متعارف کرائے گئے ای چالان سسٹم 2025 کا مکمل تجزیہ کرنے کا ٹاسک دیا گیا ہے، تاکہ اس کے مؤثر نفاذ، جرمانوں کی پالیسی اور عوامی سہولت سے متعلق پہلوؤں کا باریک بینی سے جائزہ لیا جا سکے۔

کمیٹی کے چیئرمین صوبائی وزیر داخلہ ضیا الحسن لنجار ہوں گے، جبکہ اراکین میں اپوزیشن لیڈر علی خورشیدی کے علاوہ صوبائی اسمبلی اراکین آصف خان، فاروق اعوان، سعدیہ جاوید، افتخار عالم، طحہ احمد، شبیر قریشی سمیت ایڈیشنل چیف سیکریٹری داخلہ، سیکریٹری قانون، اے آئی جی کراچی اور ڈی آئی جی ٹریفک شامل ہیں۔

کمیٹی کو ہدایت کی گئی ہے کہ وہ ای چالان سسٹم کو مزید صارف دوست اور مؤثر بنانے کے لیے قابل عمل سفارشات تیار کرے اور ٹریفک جرمانوں کی موجودہ پالیسی کا بھی جائزہ لے کر رپورٹ پیش کرے۔