کوے کی ذہانت اور چالاکی پر تحقیق، آپ بھی حیران کردے گی

سائنس کی دنیا میں ایک نئی تحقیق نے ثابت کیا ہے کہ کوے نہ صرف انتہائی ذہین پرندے ہیں بلکہ وہ کئی ایسی صلاحیتوں کے مالک ہیں جو پہلے صرف انسانوں سے مخصوص سمجھی جاتی تھیں۔

جرمنی اور امریکا کی حالیہ تحقیقات نے ان پرندوں کے حیرت انگیز ذہنی قابلیت کو اجاگر کیا ہے۔

ٹیوبنگن یونیورسٹی، جرمنی کی تحقیق کے مطابق کوے جیومیٹری کی پیچیدہ شکلیں پہچاننے کی صلاحیت رکھتے ہیں۔

تجربات میں کوؤں نے چوکور، تکون اور دیگر جیومیٹری کی شکلیں درست طریقے سے پہچانیں جبکہ لائنوں کے زاویوں اور تفصیلات میں فرق کرنا سیکھا۔

کمپیوٹر اسکرین پر 6 مختلف شکلوں میں تمیز کرنے میں کامیابی حاصل کی۔

واشنگٹن یونیورسٹی کی 17 سالہ تحقیق (2006-2023) نے ثابت کیا کہ کوے چہروں کو 15 سال تک یاد رکھ سکتے ہیں، وہ خطرے کا باعث بننے والے افراد کو شناخت کر لیتے ہیں اور پھر یہ معلومات وہ اپنی نسل در نسل منتقل کرتے ہیں۔

ماہرین کے مطابق کوے 1 سے 4 تک کی گنتی کر سکتے ہیں جبکہ اسکرین پر دکھائے گئے نمبروں کے مطابق کاں کاں کرنے کی صلاحیت رکھتے ہیں۔

ماہرین نے بتایا کہ کوے ٹولز استعمال کرنے اور بنانے کی مہارت رکھتے ہیں، جبکہ کھانہ ذخیرہ کرنے اور اسے یاد رکھتے ہیں اس کے ساتھ کھیلوں میں دلچسپی اور پیچیدہ مسائل کو حل کرنے کی اہلیت رکھتے ہیں۔

ماہرین کا کہنا ہے کہ کوؤں کی یہ غیر معمولی ذہانت انہیں پرندوں کی دنیا کا سب سے ذہین رکن بناتی ہے۔ ان تحقیقات سے نہ صرف جانوروں کے دماغی عمل کو سمجھنے میں مدد ملے گی بلکہ مصنوعی ذہانت کے شعبے میں بھی نئے راستے کھلیں گے۔