اسلام آباد میں تفریح کیلیے آئے 14 سالہ لڑکے سے اسلحے کے زور پر اجتماعی زیادتی

پاکستان میں ریپ کا ایک اور کیس سامنے آیا ہے، اسلام آباد کے تفریحی مقام راول ڈیم پکنک پوائنٹ پر ایک 14 سالہ لڑکے کو مبینہ طور پر زیادتی کا نشانہ بنایا گیا۔

مقدمے کی فرسٹ انفارمیشن رپورٹ (ایف آئی آر) کے مطابق صادق آباد کے رہائشی لڑکے کو دو افراد نے گن پوائنٹ پر زیادتی کا نشانہ بنایا۔ پولیس رپورٹ میں کہا گیا ہے کہ ملزمان بدتمیزی کی ویڈیو بنا کر دھمکیاں دیتے رہے۔

پولیس کا کہنا ہے کہ لڑکے کا طبی معائنہ کر کے ملزمان کے خلاف کارروائی کی جائے گی۔

حالیہ کچھ عرصے کے دوران ملک میں نابالغ لڑکوں کے ساتھ جنسی زیادتی کے واقعات رپورٹ ہوئے ہیں اس کے علاوہ حکام کی جانب سے ایسے واقعات کو روکنے کے لیے کارروائی بھی کی گئی ہے۔

ایسے ہی ایک واقعے میں خیبرپختونخوا کے ضلع بنوں میں ایک چار سالہ بچے کو مبینہ طور پر زیادتی کا نشانہ بنایا گیا اور بعد میں قتل کر دیا گیا۔ پولیس کے مطابق واقعہ بنوں شہر کے جمن روڈ پر پیش آیا جہاں 4 سالہ بچے کو اس کے ماموں نے زیادتی کے بعد قتل کر دیا۔

پولیس نے بتایا کہ مشتبہ شخص کو حراست میں لے لیا گیا ہے۔