اچھرہ واقعہ، سینیٹرز کا الزام لگانے والوں کیخلاف کارروائی کا مطالبہ

لاہور کے علاقے اچھرہ میں دو روز قبل خاتون کے ساتھ پیش آنے والے ہراسانی کے خوفناک واقعے کا معاملہ سینیٹ تک پہنچ گیا جہاں سینیٹرز نے توہین مذہب کا جھوٹا الزام لگانے والوں کیخلاف سخت کارروائی کا مطالبہ کیا ہے۔

تفصیلات کے مطابق سینیٹ اجلاس میں اراکین نے لاہور میں پیش آئے واقعے کی مذمت کرتے ہوئے کہا کہ توہین مذہب کا جھوٹا الزام لگانے والوں کو کڑی سزا دی جائے۔

سینیٹر روبینہ خالد نے ایوان میں اظہار خیال کرتے ہوئے کہا کہ ’ہمارے معاشرے میں عدم برداشت اور جہالت پھیل رہی ہے، ایک خاتون نے حرف تہجی والا لباس پہنا اور قرآنی آیات سے نابلد افراد نے اُسے توہین قرار دے کر خاتون سے معافی منگوائی جبکہ ہجوم کے خلاف کوئی کارروائی نہیں کی گئی۔

انہوں نے کہا کہ خاتون نے جو شرٹ پہنچی وہ سعودی عرب کا بوانڈ تھا مگر لڑکی کو بھرے بازار میں عربی لفظ کی وجہ سے ہراساں کیا گیا، یہ کہاں کا انصاف ہے۔

ایم کیو ایم پاکستان کے رہنما اور سینیٹر فیصل سبزواری نے کہا کہ ’معاشرے میں بدقسمتی سے برداشت بہت کم ہوگئی ہے، ہمیں ایک دوسرے پر توہین مذہب کے الزامات عائد نہیں کرنے چاہیں‘۔ انہوں نے کہا کہ ایسے الزامات عائد کرنے والوں کے خلاف سخت کارروائی کی جائے کیونکہ اسلام امن و آشتی کا مذہب ہے۔

فیصل سبزواری نے یہ بھی کہا کہ ایسے واقعات سے ہمارا ملک پاکستان اور اسلام کی بدنامی ہوتی ہے۔