ڈی ایس پی علی رضا کے قتل میں ملوث 2 ملزمان انجام کو پہنچ گئے

کراچی : شہر قائد کے علاقے شیر شاہ میں محکمہ انسداد دہشت گردی (سی ٹی ڈی) نے اہم کارروائی کرتے ہوئے ڈی ایس پی سی ٹی ڈی علی رضا کے قتل میں ملوث 2ملزمان کوہلاک کردیا۔

سی ٹی ڈی حکام کا اس حوالے سے کہنا ہے کہ دہشت گردوں کی شناخت قاسم رشید اور عثمان کے نام سے کی گئی، دہشت گردوں نے رواں سال ڈی ایس پی سی ٹی ڈی علی رضا کو کریم آباد میں فائرنگ کرکے شہید کردیا تھا۔

میڈیا سے گفتگو کرتے ہوئے ڈی ایس پی سی ٹی ڈی راجہ عمر خطاب نے کہا کہ ریکی کرنے والے 2 ملزمان کو گرفتار کیا جن کی نشاندہی پر شیر شاہ پرچھاپا مارا جہاں پر شہید ڈی ایس پر براہ راست فائرنگ کرنے والے دونوں دہشت گرد مقابلے میں ہلاک ہوگئے۔

انہوں نے بتایا کہ ہلاک ملزمان کا تعلق لشگر جھنگوی سے تھا جو اب تحریک طالبان میں شامل ہوئے تھے۔ملزمان پر 35 کیس درج تھے،جن میں سے 25قتل کے کیس ہیں۔

ہلاک دہشتگردوں کی گرفتاری میں مدد دینے والے کے لیے 50لاکھ انعام کا اعلان کیا گیا تھا۔