گھریلو صارفین کی سہولت کیلیے ہفتے کو گیس سپلائی بند رکھنے کا اعلان، کن شعبوں میں بندش ہوگی؟

کراچی میں موسمِ سرما کے دوران گیس کی بڑھتی ہوئی طلب کے باعث صنعتی اور سی این جی شعبے کو عارضی طور پر گیس کی فراہمی بند کرنے کا فیصلہ کیا گیا ہے۔ سوئی سدرن گیس کمپنی (ایس ایس جی سی) کے ترجمان کے مطابق شہر میں صنعتوں، کیپٹو پاور پلانٹس اور تمام سی این جی اسٹیشنز کو 48 گھنٹوں کے لیے گیس نہیں ملے گی۔

ترجمان نے بتایا کہ گیس کی بندش ہفتہ 24 جنوری کی صبح 8 بجے سے شروع ہوگی جو پیر 26 جنوری کی صبح 8 بجے تک جاری رہے گی۔ یہ اقدام سرد موسم میں گھریلو اور تجارتی صارفین کی ضروریات کو مدنظر رکھتے ہوئے کیا گیا ہے۔

ایس ایس جی سی کے مطابق اس عارضی بندش کا مقصد محدود گیس وسائل کو بہتر انداز میں منظم کرنا اور نیٹ ورک پر دباؤ کم کرنا ہے تاکہ گھریلو اور کمرشل صارفین کو گیس کی فراہمی میں بہتری لائی جا سکے۔

گیس کمپنی کا کہنا ہے کہ سردیوں میں گیس کی کھپت میں نمایاں اضافہ ہو جاتا ہے، جس کے باعث طلب اور رسد میں فرق پیدا ہوتا ہے۔ اسی صورتحال کو سنبھالنے کے لیے یہ فیصلہ کیا گیا ہے، تاکہ شہر میں گیس پریشر کو مستحکم رکھا جا سکے۔