کراچی: کمسن دعا کے اغوا و زیادتی کیس کا مشتبہ ملزم مبینہ پولیس مقابلے میں ہلاک

کراچی کے علاقے جیکسن تھانے کی حدود میں پولیس مقابلے کے دوران سات سالہ دعا کے اغوا اور مبینہ زیادتی کے مقدمے کا مشتبہ ملزم ہلاک ہو گیا۔

ایس ایس پی کیماڑی سنگھار ملک کے مطابق جیکسن پولیس بچی کے اغوا اور قتل کیس کی تفتیش کر رہی تھی۔ سی سی ٹی وی فوٹیجز اور دیگر شواہد کی مدد سے ایک مشتبہ شخص کی موجودگی کی اطلاع ملی، جس پر پولیس نے مبارک مسجد کے قریب کارروائی کی۔

ایس ایس پی کے مطابق پولیس کو دیکھتے ہی مشتبہ ملزم نے فائرنگ کر دی، جس کے بعد جوابی کارروائی میں وہ ہلاک ہو گیا۔ پولیس نے جائے وقوعہ سے شواہد جمع کر لیے ہیں جبکہ قانونی اور فرانزک کارروائی جاری ہے۔

پولیس کا کہنا ہے کہ ہلاک ہونے والے شخص کی شناخت اور کمسن دعا کے اغوا و قتل کیس سے اس کے ممکنہ تعلق کی مزید تحقیقات کی جا رہی ہیں۔

دوسری جانب پولیس سرجن نے بھی ابتدائی معائنے کے بعد کمسن دعا کے ساتھ زیادتی کی تصدیق کر دی ہے، جبکہ واقعے کی مزید تفتیش جاری ہے۔