کراچی میں ایک اور ہیوی ٹریفک کا حادثہ، 27 سالہ فوڈ ڈلیوری رائیڈر جاں بحق

کراچی میں ہیوی ٹریفک سے شہریوں کی ہلاکتوں کا سلسلہ جاری ہے اور ایک اور موٹرسائیکل سوار نوجوان جان کی بازی ہار گیا۔

تفصیلات کے مطابق کراچی کے ضلع وسطی میں شاہراہ لیاقت پر کریم آباد فلائی اوور شکیل کارپوریشن کے قریب ٹریلر کی ٹکر سے آن لائن فوڈ رائیڈر جاں بحق ہوگیا۔

متوفی کی لاش چھیپا کے رضا کاروں نے ضابطے کی کارروائی کے لیے عباسی شہید اسپتال منتقل کی۔ متوفی کی شناخت 27 سالہ شبیر کے نام سے ہوئی اور یہ کلفٹن کے قریب کا رہائشی تھا۔

قبل ازیں بریگیڈ تھانے کی حدود میں سوسائٹی آفس کے قریب عبدالحئی اور سائٹ ایریا حبیب بینک پُل پر مزدا کی ٹکر سے 26 سال رضوان جاں بحق ہوا جس کا 21 دسمبر کو نکاح طے تھا۔

متوفی چار بہن بھائیوں میں سب سے بڑا اور اپنے گھر گولیمار سے سائٹ ایریا پرنٹنگ پریس جارہا تھا۔