کورنگی تھانے کی پارکنگ سے موٹرسائیکل چوری

 کراچی:  شہر قائد کار اور موٹر سائیکل لفٹرز کیلیے جنت بن گیا، محفوظ مقامات بھی اب محفوظ نہیں رہے، کورنگی تھانے کی پارکنگ سے ہی موٹرسائیکل چوری کرلی گئی۔

کراچی کے ضلع کورنگی میں گلی، محلے اور شاہراہوں کے بعد اب تھانے بھی غیر محفوظ ہوگئے۔ کورنگی تھانے آنے والے ایک شہری کی بائیک چوری ہوگئی۔

متاثرہ شہری نے بتایا کہ اپنے دوست کے ساتھ تھانہ کورنگی تفتیشی افسر سے ملاقات کیلئے آیا تھا، ملاقات کے بعد تھانے کی پارکنگ میں واپس آیا تو دیکھا کہ بائیک ہی اپنی جگہ پر نہیں تھی۔

کورنگی تھانہ پولیس نے متاثرہ شہری کی واقعے کی شکایت جمع کرلی ہے، پولیس حکام کے مطابق تھانے کی سی سی ٹی وی فوٹیج کی مدد سے ملزم کی نشاندہی کی جائے گی، تاہم ذرائع کے مطابق کورنگی تھانے کے سی سی ٹی وی کیمرے گزشتہ کئی ماہ سے خراب پڑے ہیں۔

خیال رہے یاد رہے کہ صرف کراچی سے رواں سال کے 9 ماہ کے دوران 40 ہزار سے زائد موٹرسائیکلیں چوری یا چھینی جا چکی ہیں۔