لاہور میں شوہر کی مارپیٹ سے تنگ بیوی چار بچے چھوڑ کر چلی گئی

سیالکوٹ سے تعلق رکھنے والی رہائشی خاتون شوہر کی مارپیٹ سے تنگ آکر چار بچے گریٹر اقبال پارک چھوڑ کر چلی گئی۔

ماں کے چھوڑ جانے کے بعد بچوں نے کھلے آسمان تلے وقت گزارا اور انتظار کرتے رہے، رات گئے پولیس نے بچوں کو تحویل میں لے کر چائلڈ پروٹیکشن کے حوالے کیا۔

مقامی افراد کی اطلاع پر پولیس وہاں پہنچی اور بچوں کو تحویل میں لے لیا۔ 7 سالہ بچے زین نے پولیس کوبتایا کہ وہ سمبڑیال کے رہائشی ہیں، والد والدہ کو روزانہ مارتے تھے، پولیس نے زین کی اطلاع پر ان کے والدین کی تلاش شروع کر دی اور بچوں کو چائلڈ پروٹیکشن بیورو کی ٹیم کے حوالے کردیا۔

گریٹر اقبال پارک سے ملنے والے بچوں میں سے تین لڑکیوں اور ایک لڑکے کی عمریں 8 ماہ سے 7 سال کے درمیان ہیں۔

چیئرپرسن چائلڈ پروٹیکشن بیورو سارہ احمد کا کہنا ہے کہ چائلڈ پروٹیکشن بیورو میں بچوں کی بہترین دیکھ بھال کی جائے گی۔