ملیر جیل سے 225 قیدیوں کے فرار کا معاملہ، ذمہ دار کا تعین ہوگیا

شہر قائد کے ملیر جیل سے 225 قیدیوں کے فرار کے واقعے کی تحقیقات مکمل کر لی گئی ہیں جس کی رپورٹ چیف سیکریٹری سندھ کو پیش کر دی گئی۔

اس رپورٹ میں جیل حکام سمیت اعلیٰ افسران کو بھی غفلت کا ذمہ دار قرار دیا گیا ہے۔رپورٹ کے مطابق سابق سپرنٹنڈنٹ ارشد شاہ، اسسٹنٹ سپرنٹنڈنٹ عبداللہ خاصخیلی اور ڈپٹی سپرنٹنڈنٹ ذوالفقار پیرزادہ کو غفلت کا مرتکب قرار دیتے ہوئے ان کے خلاف ایف آئی آر درج کرنے کی سفارش کی گئی ہے۔

رپورٹ میں آئی جی اور ڈی آئی جی جیل خانہ جات کو بھی واقعے کا ذمہ دار ٹھہرایا گیا اور اسے انتظامی اور ادارہ جاتی ناکامی قرار دیا گیا۔

تحقیقات میں کہا گیا ہے کہ ملیر جیل میں تیاری، تربیت اور سیکیورٹی کا شدید فقدان تھا، جبکہ جیل کے دروازے، دیواریں اور کنٹرول پوائنٹس مزید مضبوط بنانے کی ضرورت ہے۔

رپورٹ میں سفارش کی گئی ہے کہ جیل میں جدید سی سی ٹی وی نظام 24 گھنٹے فعال رکھا جائے، افسران اور عملے کو کرائسس ریسپانس ٹریننگ لازمی دی جائے اور قیدیوں و عملے کے لیے ہنگامی مقامات مختص کیے جائیں۔

مزید یہ کہ جیل کے حساس مقامات پر موشن سینسرز اور الارم سسٹم نصب کرنے، اسلحہ خانہ الگ قائم کرنے اور اینٹی رائٹ سامان و ڈرونز محفوظ رکھنے کی سفارش بھی کی گئی ہے۔ رپورٹ میں کہا گیا ہے کہ یہ واقعہ محض غفلت نہیں بلکہ نظام کی مکمل ناکامی کی عکاسی کرتا ہے۔