پشاور تین سالہ بچی اغوا کے بعد بے دردی سے قتل

پشاور کے علاقے تھانہ خزانہ کے حدود میں تین سالہ بچی اغواء کے بعد بے دردی سے قتل کر دی گئی۔

تفصیلات کے مطابق چارسدہ روڈ بخشو پل ، گاوں مسلم آباد ریاض گھڑی میں نامعلوم افراد نے دن دو بجے یمنی نامی بچی کو گھر کے باہر سے اغواکیا۔ جس کے بعد تھانہ خزانہ میں  اغواء کا مقدمہ درج کیا گیا۔

اس کے بعد رات بارہ بجے گھر کے سامنے بچی کی لاش پھینک دی گئی اور ملزمان فرار ہوگئے۔

علاقہ مکینوں کا کہنا ہے کہ آئے روز اس طرح کے واقعات علاقے میں معمول بن چکا ہے لیکن پولیس اور قانون نافذ کرنے والے اداروں کا اس کی روک تھام کے لئے کوئی خاص کارروائی عمل میں نہیں لائی گئی۔

بچی کے والدین نے مطالبہ کیا ہے کہ قاتلوں کو جلد از جلد گرفتار کر کے انکو کیفر کردار تک پہنچایا جائے اور لوگوں کے جان و مال کی حفاظت کو یقینی بنایا جائے۔