شہری نے ڈکیت کے منہ پر تھپڑ مار کر بھگا دیا

گجرانوالہ میں ایک شہری نے ڈکیتی کی نیت سے اپنے قریب آنے والے مسلح شخص کو پلک جھپکتے منہ پر زور دار تھپڑ مار کر بھگا دیا۔

 تفصیلات کے مطابق واقعہ 5 اپریل (جمعہ) کو گوجرانوالہ کے علاقے باجوہ روڈ پر پیش آیا۔

 اس بہادری کے کام کی کلوزڈ سرکٹ ٹیلی ویژن فوٹیج بھی سوشل میڈیا پر وائرل ہوئی، جس میں اس شخص کو ڈاکوؤں کا مقابلہ کرتے ہوئے دیکھا جا سکتا ہے۔

 وائرل ویڈیو کے مطابق، موٹر سائیکل پر سوار دو ڈاکوؤں نے ہدایت اللہ کو باجوہ روڈ پر لوٹنے کے ارادے سے روک لیا۔

 جونہی ڈاکوؤں میں سے ایک ہدایت اللہ کے قریب پہنچا تو اس نے بہادری سے ڈاکو کو تھپڑ مارا جس کے جواب میں ڈاکو نے اس شخص پر فائرنگ کر دی۔

 تاہم واقعے کا ہیرو خوش قسمتی سے فائرنگ سے محفوظ رہا۔

 ڈکیتی کی ناکام کوشش کے بعد ڈاکو موقع سے فرار ہو گئے۔