شمالی وزیرستان میں کارروائی کے دوران 5 خوارج ہلاک، میجر شہید

سیکیورٹی فورسز نے شمالی وزیرستان کے علاقے رزمک میں کارروائی کے دوران پانچ خوارج ہلاک جبکہ پاک فوج کے میجر شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق رزمک میں بھارتی حمایت یافتہ 'فتنہ الخوارج' سے وابستہ خوارج کی موجودگی کی اطلاع پر انٹیلی جنس بیسڈ آپریشن کیا، اس موثر کارروائی کے نتیجے میں پانچ خوارج مارے گئے۔

آئی ایس پی آر کے مطابق اپریشن کے دوران شدید فائرنگ کے تبادلے کے دوران، میانوالی کے 34 سالہ میجر حافظ احسان الٰہی نے بہادری سے لڑتے ہوئے جامِ شہادت نوش کیا۔

آئی ایس پی آر کے مطابق حافظ احسان بہادر افسر اور اپنے دستوں کی فرنٹ سے قیادت کر رہے تھے۔

آپریشن کے دوران ہلاک ہونے والے خوارج کے قبضے سے اسلحہ اور گولہ بارود بھی برآمد کیا گیا، یہ خوارج سیکیورٹی فورسز اور قانون نافذ کرنے والے اداروں کے خلاف متعدد دہشت گرد کارروائیوں اور بے گناہ شہریوں کے قتل میں ملوث تھے۔

فورسز کی جانب سے علاقے میں موجود کسی بھی ممکنہ بھارتی حمایت یافتہ خارجی کے خاتمے کے لیے کلیئرنس آپریشن جاری ہے۔

آئی ایس پی آر کا کہنا ہے کہ سکیورٹی فورسز اور قانون نافذ کرنے والے ادارے غیر ملکی سرپرستی میں ہونے والی دہشت گردی کے مکمل خاتمے تک کارروائیاں جاری رکھیں گے، بہادر سپاہیوں کی یہ قربانیاں وطن کے دفاع کے عزم کو مزید مضبوط بناتی ہیں۔