بھارتی حکومت سچ دکھانے پر ہواس باختہ، رائٹرز کو بلاک کردیا

نئی دہلی: بھارتی حکومت نے بین الاقوامی خبر رساں ایجنسی رائٹرز کے آفیشل ایکس اکاؤنٹ (سابقہ ٹویٹر) تک رسائی بھارت میں بلاک کر دی ہے۔

نیوز بائٹس کی رپورٹ کے مطابق یہ اقدام گزشتہ رات دیر گئے نافذ ہوا، جس سے بہت سے صارفین حیران اور پریشان ہیں۔

بھارت میں رائٹرز کے ہینڈل تک رسائی حاصل کرنے کی کوشش پر، ایک پیغام ظاہر ہوتا ہے جس میں لکھا ہے کہ "قانونی مطالبے کی تعمیل میں رائٹرز کا اکاؤنٹ بھارت میں بلاک کردیا گیا ہے۔"

دکن کرونیکل کے مطابق، بھارتی حکومت کی جانب سے رائٹرز کے ایکس اکاؤنٹ کو بلاک کرنے کی کوئی سرکاری وجہ نہیں بتائی گئی۔

اس اقدام کو بھارتی حکومت کی جانب سے میڈیا پر بڑھتی ہوئی سنسر شپ کی ایک اور مثال کے طور پر دیکھا جا رہا ہے، خاص طور پر پاکستانی مواد کو بلاک کرنے کے بعد اب بین الاقوامی میڈیا کو بھی نشانہ بنایا جا رہا ہے۔

مبصرین کا کہنا ہے کہ یہ قدم وزیر اعظم مودی کی حکومت کی طرف سے سخت اقدامات اور **غیر اعلانیہ ایمرجنسی** جیسی صورتحال کی عکاسی کرتا ہے۔

ملک کے اندر 'گودی میڈیا' (حکومت کے حامی میڈیا) میں اس اقدام پر کسی بھی کھلی بحث یا غیر جانبدارانہ نقطہ نظر کی توقع نہیں ہے، جو حکمران جماعت بی جے پی کے فاشسٹ نظریات اور پالیسیوں کے نفاذ کی طرف اشارہ کرتا ہے۔

---