لاس اینجلس آتشزدگی، دنیا کا کوئی بھی پانی آگ نہیں بجھا سکتا، ماہرین کا انکشاف

لاس اینجلس کے جنگلات میں لگی آتشزدگی کے نتیجے میں کم از کم 11 افراد ہلاک جبکہ ہزاروں بے گھر ہوگئے ہیں،  اس کے ساتھ ہی کاروبار، اسکول، گرجا گھر ، جل کر راکھ ہوگئے۔

سی این این کی ایک رپورٹ کے مطابق لاس اینجلس کے جنگلات میں لگنے والی آگ کی شدت اس قدر ہے کہ دنیا کا کوئی بھی پانی کا نظام اس پر قابو نہیں پاسکتا۔

ماہرین کے مطابق کیلی فورنیا سمیت امریکا بھر کے فائر ٹینڈرز اور یہاں موجود پانی بھی آگ بجھانے کیلیے ناکافی ہے۔

ایک فائر فائٹر نے انکشاف کیا کہ ہائیڈرنٹ میں پانی ختم ہوگیا ہے جس کے بعد ہم نے قریبی کاؤنٹی سے پانی فراہم کرنے کی درخواست کی جبکہ بیشتر فائر بریگیڈ کی گاڑیاں خشک ہوگئی ہیں۔

تاہم، آبی وسائل کے ایک ماہر نے نوٹ کیا کہ مکمل طور پر آپریشنل ہائیڈرنٹس کچھ نقصان کو کم کرنے میں مدد کر رہے ہیں۔ ایک اور ماہر نے نشاندہی کی کہ کچھ ہائیڈرنٹس میں غیر معمولی طلب کی وجہ سے پانی ختم ہوگیا ہے  کیونکہ اس طرح کی شدت کے ساتھ آگ پہلے کبھی نہیں لگی۔ 

رپورٹ میں مزید وضاحت کی گئی ہے کہ پیسیفک پیلیسیڈس کو پائپ کے سائز میں کمی کی وجہ سے پانی کے بہاؤ میں کمی کا سامنا کرنا پڑ رہا ہے۔

ایک فائر فائٹر نے بتایا کہ آگ بجھانے کی کوششوں میں مدد کے لیے تقریباً 10 لاکھ گیلن پانی کے ساتھ تین علیحدہ پانی ذخیرہ کرنے کے ٹینک شامل کیے گئے تھے۔ تاہم پانی ختم ہوگیا ہے۔