رمضان میں مسلمانوں کو مسجد الاقصی میں عبادت کی اجازت دی جائے، امریکا

امریکا نے اسرائیل سے مطالبہ کیا ہے کہ رمضان المبارک کے مہینے میں مسجد اقصیٰ کے احاطے میں مسلمانوں کو عبادت کی اجازت دی جائے۔

عرب نیوز کے مطابق امریکا کے محکمہ خارجہ کے ترجمان میتھیو ملر نے یومیہ پریس بریفنگ کے دوران پوچھے گئے ایک سوال کے جواب میں کہا کہ امریکا نے اسرائیل پر زور دیا ہے کہ وہ رمضان المبارک میں ماضی کی طرح مسلمانوں کو مسجد الاقصیٰ میں عبادت کی اجازت دے۔

انہوں نے کہا کہ ہم نے زور دیا ہے کہ اسرائیلی حکام رمضان میں پُرامن نمازیوں اور عبادت گزاروں کو مسجد تک رسائیں دیں، یہ اخلاقی طور اور مذہبی اعتبار سے درست ہے کیونکہ مذہبی آزادی کے تحت عبادت ہر شخص کا حق ہے اور یہ اسرائیلی سلامتی کیلیے بھی اہم ہے۔

واضح رہے کہ اسرائیلی وزیراعظم نیتن یاہو نے گزشتہ ہفتے اپنے ایک بیان میں کہا تھا کہ سیکیورٹی خدشات کے پیش نظر مسجد الاقصی میں مسلمانوں کو عبادت کی اجازت نہیں دی جائے گی۔