اسرائیل کا شام میں ایرانی سفارتخانے پر حملہ، 8 افراد جاں بحق

اسرائیل کی جانب سے شام کے دارالحکومت دمشق میں ایران کے سفارتخانے پر میزائل حملہ کیا گیا ہے جس کے نتیجے میں 8افراد جاں بحق ہوگئے، جس میں متعدد سفارتکار بھی شامل ہیں۔

غیر ملکی ذرائع ابلاغ کے مطابق اسرائیل نے دمشق میں ایرانی سفارتخانے کے قونصلر سیکشن کو میزائل حملے کا نشانہ بنایا جس کے نتیجے میں عمارت تباہ ہوگئی۔

ایرانی میڈیا کے مطابق اسرائیلی حملے میں 8 افراد جاں بحق ہوگئے۔

دمشق میں سفارتکاروں کی ہلاکت کی ایران کے سرکاری میڈیا نے تصدیق کی اور کہا کہ دمشق میں اسرائیلی حملے میں متعدد ایرانی سفارتکار بھی جاں بحق ہوئے۔

غیر ملکی خبر رساں ایجنسی کے مطابق دمشق میں اسرائیلی حملے میں جاں بحق ہونے والوں میں ایرانی پاسداران انقلاب کے القدس بریگیڈز کے سینیئر کمانڈر رضا زاہدی بھی شامل ہیں۔