ایران کشیدگی، دبئی حکومت کا 1 ارب درہم سے زائد کا پیکج

دبئی حکومت نے خطے میں جاری کشیدگی کے اثرات سے نمٹنے کے لیے 27 کروڑ ڈالر سے زائد مالیت کے مالیاتی پیکیج کا اعلان کر دیا ہے، جس کا مقصد عوام اور کاروباری طبقے کو سہارا فراہم کرنا ہے۔

حکام کے مطابق ایک ارب درہم سے زائد کے اس پیکیج میں مختلف اقدامات شامل ہیں، جن کے ذریعے شہریوں، خاندانوں اور کمپنیوں کو موجودہ معاشی دباؤ سے نکالنے میں مدد دی جائے گی۔

یہ فیصلہ ایسے وقت میں سامنے آیا ہے جب خلیجی معیشتیں حالیہ کشیدگی کے باعث متاثر ہو رہی ہیں، خاص طور پر تیل کی ترسیل کے اہم راستے آبنائے ہرمز میں رکاوٹوں کے بعد صورتحال مزید پیچیدہ ہو گئی ہے۔

دبئی کے سرکاری ذرائع کا کہنا ہے کہ یہ اقدام حکومت کی طویل مدتی حکمت عملی کا حصہ ہے، جس کے تحت مشکل حالات میں بھی معیشت کو مستحکم رکھنے اور شہریوں کو ریلیف فراہم کرنے کو ترجیح دی جا رہی ہے۔

ماہرین کے مطابق اس طرح کے مالیاتی اقدامات سے کاروباری سرگرمیوں کو سہارا مل سکتا ہے اور معاشی استحکام برقرار رکھنے میں مدد ملے گی۔