کراچی، علاقے میں قبضہ کرنے پر خاتون بھکاری عدالت پہنچ گئی

کراچی کی مقامی عدالت میں خاتون بھکاری حدود کے تنازع پر اپنے ساتھیوں کے خلاف عدالت پہنچ گئی۔

کراچی کی ایک مقامی عدالت میں جمعہ کے روز ایک عجیب و غریب کیس کی سماعت ہوئی۔

خاتون نے مقدمہ درج کروایا کہ تین مرد بھکاریوں نے اس کی جگہ پر قبضہ کر کے اسے تشدد کا نشانہ بنایا اور پھر علاقہ بدر کردیا۔

 ایڈیشنل ڈسٹرکٹ اینڈ سیشن عدالت نے خاتون بھکاری کے مقدمے کا فیصلہ سنایا اور درخواست کو مسترد کردیا تاہم صورت حال پر تشویش کا اظہار کیا۔

جج نے ان بنیادی وجوہات پر تشویش کا اظہار کیا جو لوگوں کو بھیک مانگنے پر مجبور کرتی ہیں۔

 عدالت نے وضاحت کی کہ اس کی درخواست کی غیر قانونی نوعیت کی وجہ سے اس کے حق میں فیصلہ ممکن نہیں تھا۔

 فیصلے میں کہا گیا کہ عوامی مقامات کو بھیک مانگنے کے لیے مختص نہیں کیا جا سکتا اور اس میں شامل تمام فریقوں کو درپیش مشکلات کے خاتمے کی امید ظاہر کی گئی۔

 پولیس کے مطابق سعود آباد میں فٹ پاتھ پر بھیک مانگنے والی خاتون کو تین دیگر افراد نے علاقہ چھوڑنے پر مجبور کردیا۔

 اس نے ان کے خلاف ہراسانی کی شکایت درج کروائی، لیکن پولیس نے مقدمہ درج کرنے سے انکار کردیا۔

 اس کے بعد بے گھر خاتون نے تینوں بھکاریوں شف، نذیر اور میر گل کے خلاف عدالت میں مقدمہ دائر کیا۔