ویڈیو: اسٹیٹ بینک کی سنگین غفلت، ادھوری پرنٹنگ والے نوٹ مارکیٹ میں پیش کردیے

اسٹیٹ بینک آف پاکستان کی طرف سے مبینہ طور پر چھاپے گئے نئے کرنسی نوٹ کی پرنٹنگ میں بڑی اور سنگین غفلت سامنے آئی ہے۔

کراچی کے علاقے ماڈل کالونی کے مینیجر نے اس حوالے سے سوشل میڈیا پر ایک ویڈیو پوسٹ کی اور دعویٰ کیا کہ اُن کی برانچ میں اسٹیٹ بینک کی جانب سے نئے نوٹ بھیجے گئے ہیں۔

مینیجر نے ویڈیو میں دکھایا کہ 1 ہزار والے کرنسی نوٹ کے ایک طرف پرنٹنگ ہے جبکہ دوسری طرف سادہ ہے۔

انہوں نے دعویٰ کیا کہ اسٹیٹ بینک کی طرف سے یہ نئے نوٹ کی گڈیاں آج ہی موصول ہوئیں تھیں جنہیں معمول کے مطابق کیشیئر کے حوالے کیا گیا اور ان میں سے کئی گڈیاں تو صارفین لے جاچکے ہیں۔

ایک صارف نے جب نوٹ واپس کیے تو معاملہ سامنے آیا۔ اُدھر اسٹیٹ بینک کے ترجمان نے واقعے کی تصدیق کرتے ہوئے کہا ہے کہ آپریشن ڈیپارٹمنٹ کو اس حوالے سے آگاہ کردیا گیا ہے جس کی تفصیلات جلد میڈیا سے شیئر کی جائیں گی۔

ترجمان نیشنل بینک کے مطابق ویڈیو کے حوالے سے آپریشن ڈپارٹمنٹ کو مطلع کردیا گیا۔