کارساز واقعے میں مرنے والی آمنہ عارف کے ہوش و حواس میں آخری الفاظ سامنے آگئے

کراچی کے علاقے کارساز پر تیز رفتار گاڑی کی ٹکر سے جاں بحق ہونے والی نوجوان لڑکی آمنہ کا آخری واٹس ایپ اسٹیٹس سوشل میڈیا پر وائرل ہورہا ہے۔

آمنہ کی ایک دوست نے اس اسٹیٹس کو سماجی رابطے کی سائٹ پر شیئر کیا اور بتایا کہ آمنہ کا آخری پیغام یہ تھا۔

آمنہ نے اپنے پیغام میں والدین کو مخاطب کرتے ہوئے لکھا تھا کہ وہ اپنی بیٹیوں کو سسرال کے طعنے نہ دیں بلکہ دعا کیا کریں کہ بیٹی ناز نخرے اٹھانے والوں کے گھر جائے۔

انہوں نے لکھا تھا کہ ’بیٹیوں کو یہ نہ کہیں کہ ہاں کرلو ایسا ابھی آگے گھر جا کر سمجھ آئے گا بلکہ انہیں یہ کہیں کہ اللہ آگے بھی آپکے ناز نخرے اٹھانے والے لوگوں سے نوازے تاکہ لڑکیاں شادی سے نہ گھبرائیں‘۔

اس کے علاوہ آمنہ کا سول سسٹر نامی فیس بک گروپ پر کیا گیا گزشتہ سال کا ایک میسج بھی سامنے آیا ہے جس میں انہوں نے اپنی کامیابی کا سہرا اپنی والدہ کو دیا اور بتایا کہ جب کوئی اُن کے ساتھ نہیں تھا اُس وقت بس والدہ ساتھ تھیں۔