ایپل کا سستا ترین آئی فون جلد آنے کو تیار، قیمت کتنی ہے؟

ایپل نے اپنے صارفین کو خوشخبری سناتے ہوئے کہا ہے کہ ایپل کی جانب سے نئے سستے ترین آئی فون ایس ای کی تیاری پر کام جاری ہے۔

بلومبرگ کی ایک رپورٹ اس حوالے سے انکشاف کیا گیا ہے کہ ایپل کی جانب سے نئے آئی فون ایس ای پر کام کیا جا رہا ہے جسے 2025 میں متعارف کرایا جائے گا۔

یہ نیا آئی فون ایس ای بنیادی طور پر آئی فون 14 پر مبنی ہوگا یعنی اس میں ہوم بٹن موجود نہیں ہوگا جبکہ اس میں فیس آئی ڈی کے آپشن کا اضافہ کیا جائے گا۔

فون کے اندر کمپنی کے نئے پراسیسرز میں سے ایک موجود ہوگا جس کا مطلب یہ ہے کہ آئی فون ایس ای میں ایپل انٹیلی جنس نامی آرٹی فیشل انٹیلی جنس ماڈل پر مبنی فیچرز بھی دستیاب ہوں گے۔

ابھی یہ واضح نہیں کہ فون کے بیک پر 2022 کے آئی فون ایس ای 3 کی طرح 12 میگا پکسل کیمرا ہوگا یا اس بار زیادہ طاقتور کیمرا ڈیوائس کا حصہ بنایا جائے گا۔

واضح رہے کہ ابھی آئی فون ایس ای (2022) اس کمپنی کا سستا ترین فون ہے، جو 429 ڈالرز میں فروخت کیا جا رہا ہے۔

رپورٹ کے مطابق اس نئے آئی فون ایس ای کے ساتھ کمپنی کی جانب سے 2 نئے آئی پیڈ ائیر ماڈلز اور میجک کی بورڈ کے نئے ورژن پر بھی کام ہورہا ہے۔