معروف یوٹیوبر رجب بٹ نے پاکستان چھوڑ دیا، وی لاگنگ سے عارضی وقفے کا اعلان

معروف یوٹیوبر رجب بٹ نے حالیہ تنازع اور ان کے خلاف قانونی کارروائی کے بعد پاکستان چھوڑ دیا ہے اور عارضی طور پر وی لاگنگ سے وقفے کا اعلان کیا ہے۔

رجب بٹ پر الزام عائد کیا گیا ہے کہ انہوں نے اپنے وی لاگز میں مبینہ طور پر اسلامی شخصیات کی توہین کی، جس کے باعث لاہور ہائی کورٹ میں ان کے خلاف درخواست دائر کی گئی ہے۔

رجب بٹ نے اپنی موجودہ لوکیشن کو خفیہ رکھا ہے، تاہم ایک حالیہ ٹک ٹاک لائیو سیشن کے دوران انہوں نے دبئی اور پاکستان کے وقت کا ذکر کرتے ہوئے بیرون ملک ہونے کا اشارہ دیا۔ انہوں نے واضح کیا کہ انہوں نے وی لاگنگ کو عارضی طور پر روک دیا ہے، لیکن وہ ٹک ٹاک پر لائیو سیشنز جاری رکھیں گے۔

لائیو سیشن میں رجب بٹ نے بتایا کہ وہ اپنی والدہ کی اجازت کے بغیر کوئی نیا وی لاگ اپ لوڈ نہیں کریں گے۔ ان کے مطابق، ان کی والدہ موجودہ حالات سے پریشان ہیں اور انہوں نے اپنے بیٹے کی حفاظت کو ترجیح دیتے ہوئے خود انہیں ایئرپورٹ تک چھوڑا۔

رجب بٹ نے کہا کہ وہ وی لاگنگ کو مکمل طور پر خیرباد نہیں کہہ رہے، لیکن فی الحال حالات کے بہتر ہونے کا انتظار کریں گے۔ انہوں نے یہ بھی انکشاف کیا کہ انہوں نے اپنی صفائی کے لیے کچھ ویڈیوز ریکارڈ کی ہیں، جنہیں وہ مناسب وقت پر جاری کریں گے۔