ماریہ بی کا ترک انفلوئنسر کے خلاف قانونی کارروائی کا اعلان

لاہور: پاکستانی فیشن ڈیزائنر ماریہ بی نے ترکی کی معروف انفلوئنسر ترکان آتے کے خلاف قانونی کارروائی کا اعلان کر دیا ہے۔ معاملہ مالی معاملات اور ادائیگیوں کے تنازعے کو لے کر ہے۔  

تنازع کیا ہے؟

ماریہ بی نے انسٹاگرام پر ایک بیان جاری کرتے ہوئے کہا کہ "ہم نے ایک کنٹینٹ کریٹر کے ساتھ ادائیگی کے معاملے کو سلجھانے کی کوشش کی، لیکن انہوں نے ہمارے برانڈ کے خلاف غلط بیانی جاری رکھی۔"  

- ان کا کہنا تھا کہ ابتدائی ادائیگی کی جا چکی تھی اور مزید بات چیت جاری تھی، لیکن ترکان نے معاملے کو میڈیا پر اچھال دیا۔  

ماریہ بی کے مطابق، ان کی ٹیم نے نجی طور پر مسئلہ حل کرنے کی کوشش کی، لیکن ترکان نے تعاون نہیں کیا اور "جھوٹے الزامات"لگاتے رہیں، جس پر قانونی چارہ جوئی کا فیصلہ کیا گیا۔  

ترکان نے بھی اپنے انسٹاگرام اکاؤنٹ پر جوابی پوسٹ شیئر کی، جس میں انہوں نے کہا کہ  "ماریہ بی نے ترکی میں ہونے والے فوٹو شوٹ کے لیے مجھ سے رابطہ کیا تھا۔ میں نے ہر ڈریس کی الگ فیس طے کی تھی، لیکن انہوں نے ایک ہی رقم بھیج دی۔"  

ان کا دعویٰ ہے کہ تین ماہ گزرنے کے بعد بھی انہیں مکمل ادائیگی نہیں ہوئی، اور ان کے ساتھ "دھوکا دہی" کی گئی۔  

ترکان نے ماریہ بی کو عوامی معافی دینے کا مطالبہ کیا ہے، ورنہ وہ برانڈ کے خلاف مزید معلومات شیئر کرنے کی دھمکی دی ہے۔  

ترکان کے مطابق ماریہ بی نے ترکی میں ہونے والے شوٹ کے لیے ان سے معاونت طلب کی تھی۔  ترکان نے ہر ڈریس کی الگ فیس طے کی، لیکن برانڈ نے ایک ہی رقم بھیج دی۔  

بعد میں ماریہ بی کی ٹیم نے کہا کہ یہ "غلط فہمی" تھی، کیونکہ وہ عام طور پر "ریل فیس" پر کام کرتی ہیں۔  

ترکان کا پس منظر

ترکان اتے ایک ترکی-پاکستانی انفلوئنسر ہیں، جو اردو میں کنٹینٹ بناتی ہیں اور 853K سے زائد فالوورز رکھتی ہیں۔ انہوں نے پاکستان میں تعلیم حاصل کی اور ایک پاکستانی شہری ذکا سے شادی کی ہے۔  

قانونی جنگ کا امکان

اب دونوں فریق ایک دوسرے کے خلاف قانونی اقدامات کی دھمکی دے رہے ہیں۔ ماریہ بی نے ترکان پر بے بنیاد الزامات لگانے کا الزام لگایا ہے، جبکہ ترکان کا کہنا ہے کہ انہیں ادائیگی نہ ہونے کی وجہ سے نقصان اٹھانا پڑا ہے۔