راحت فتح علی خان کی 50 ویں سالگرہ

لاہور:عالمی شہرت یافتہ معروف پاکستانی گلوکار راحت فتح علی خان آج اپنی 50 ویں سالگرہ منا رہے ہیں۔

ذرائع کے مطابق فیصل آباد کے ایک موسیقار گھرانے میں 9 دسمبر 1974کو آنکھ کھولنے والے راحت فتح علی خان نے موسیقی کے میدان میں پہلا قدم صرف سات سال کی عمر میں رکھا۔

راحت فتح علی خان نے اپنے چچا اور استاد قوالی کے بادشاہ نصرت فتح علی خان کے زیر سایہ، نہ صرف قوالی کو سیکھا بلکہ اسے جدید دور کے تقاضوں کے مطابق پیش کیا۔

ان کی گائیکی دنیا کی ہر سرحد کو پار کرتے ہوئے دلوں کو جوڑتی ہے۔پنجابی، اردو، ہندی سمیت کئی زبانوں میں گانے والے راحت نے دنیا کے ہر خطے میں اپنے چاہنے والے پیدا کیے ہیں۔

ان کے گانے صرف موسیقی نہیں، جذبات کی وہ داستانیں ہیں جو ہر دل کو چھو لیتی ہیں، صوفیانہ کلام میں راحت فتح علی خان کی گائیکی ایک الگ ہی روحانی کیفیت پیدا کرتی ہے۔بالی وڈ میں راحت فتح علی خان کی آواز نے کئی فلموں کو امر کردیا۔