شادی اور والدین بننے کی بہترین عمر کیا ہے؟

اگرچہ سائنسی طور پر شادی اور والدین بننے کیلیے کوئی حتمی یا مثالی عمر طے نہیں کی جا سکتی تاہم ایک حالیہ امریکی سروے نے اس حوالے سے لوگوں کی رائے جاننے کی دلچسپ کوشش کی ہے۔

امریکا کے معروف پیو ریسرچ سینٹر کی جانب سے کیے گئے ایک سروے میں امریکی شہریوں سے یہ سوال پوچھا گیا کہ ان کے خیال میں شادی اور والدین بننے کے لیے بہترین عمر کون سی ہے۔

اس سروے میں شامل نصف یعنی 50 فیصد افراد نے واضح طور پر کہا کہ ان کے نزدیک شادی یا اولاد کے حصول کے لیے کوئی خاص عمر بہترین نہیں ہے۔ ہر فرد کی زندگی کے حالات اور ترجیحات مختلف ہوتی ہیں۔

تاہم، جن افراد نے مثالی عمر کے امکان کو تسلیم کیا، ان کی اکثریت نے 26 یا 27 سال کی عمر کو شادی اور والدین بننے دونوں کے لیے بہترین قرار دیا۔

اس سروے میں 3600 بالغ امریکی شہریوں نے حصہ لیا اور اپنی رائے کا اظہار کیا۔

سروے کے نتائج کے مطابق لوگوں کی اوسط رائے میں شادی کرنے کی بہترین عمر تقریباً 26.5 سال ہے۔ 23 فیصد شرکاء کا خیال تھا کہ 25 سے 29 سال کی عمر کے درمیان شادی کرنا مناسب ہے جبکہ 10 فیصد افراد نے 20 سے 24 سال یا 30 سے 34 سال کی عمر کو شادی کے لیے بہترین قرار دیا۔

دلچسپ بات یہ ہے کہ 50 فیصد افراد نے کسی بھی عمر کو شادی کے لیے مثالی ماننے سے انکار کر دیا۔

والدین بننے کے حوالے سے سروے کے نتائج قدرے مختلف تھے۔ اوسطاً 27.3 سال کی عمر کو لوگوں نے پہلا بچہ پیدا کرنے کے لیے مثالی قرار دیا لیکن اس معاملے میں بھی 40 فیصد افراد نے کسی خاص عمر کو بہترین قرار دینے سے اتفاق نہیں کیا۔

سروے میں 28 فیصد افراد نے 25 سے 29 سال کی عمر کو اولاد کے حصول کے لیے مناسب سمجھا۔ بہت کم افراد نے 20 سال سے پہلے یا 35 سال یا اس سے زائد عمر کو اس مقصد کے لیے بہترین قرار دیا۔

اس سے قبل پیو ریسرچ سینٹر نے 18 ممالک پر مشتمل ایک اور بین الاقوامی سروے کے نتائج بھی جاری کیے تھے، جس میں ارجنٹینا، بنگلادیش، گھانا، انڈونیشیا، میکسیکو، پیرو اور ترکیہ جیسے ممالک شامل تھے۔ اس سروے میں 23 ہزار سے زائد افراد نے حصہ لیا اور ان کی اوسط رائے کے مطابق شادی کرنے اور پہلے بچے کی پیدائش کی بہترین عمر 26 سال تھی۔

ان دونوں سرویز کے نتائج سے یہ ظاہر ہوتا ہے کہ اگرچہ کوئی سائنسی طور پر طے شدہ بہترین عمر موجود نہیں ہے، لیکن ایک بڑی تعداد میں لوگوں کی رائے میں 26 سے 27 سال کی عمر شادی اور والدین بننے کے لیے ایک قابل قبول اور 'مثالی' حد ہو سکتی ہے۔ تاہم، یہ بات بھی واضح ہے کہ ایک بڑی تعداد میں لوگ اس خیال سے متفق نہیں ہیں اور ہر فرد کے حالات کو زیادہ اہمیت دیتے ہیں۔