ایک سگریٹ زندگی کے 20 منٹ کم کردیتی ہے، خوفناک انکشاف

 ایک نئی تحقیق میں یہ انکشاف ہوا ہے کہ ہر ایک سگریٹ مجموعی طور پر سگریٹ پینے والے کی متوقع عمر میں تقریبا 20 منٹ کم کردیتی ہے۔

رپورٹس کے مطابق سماجی، اقتصادی اور دیگر عوامل کا حساب کتاب کرنے کے بعد، یونیورسٹی کالج لندن کے محققین نے تخمینہ لگایا کہ فی سگریٹ مرد کی متوقع زندگی کے 17 منٹ اور خواتین کے 22 منٹ کو گھٹا دیتی ہے۔

ماہرین نے اپنی رپورٹ جرنل ایڈکشن میں شائع کی ہے۔مقالے کی مرکزی مصنف اور یونیورسٹی کی پرنسپل ریسرچ فیلو، سارہ جیکسن نے کہا کہ اس کا مطلب یہ ہے کہ اگر کوئی روزانہ 20 سگریٹ کا ایک پیکٹ پیتا ہے، تو اس کا فی سگریٹ کے پیکٹ اس کی عمر میں تقریبا سات گھنٹے کم کردیتا ہے۔

سارہ جیکسن کا کہنا تھا کہ سگریٹ نوشی کرنے والوں کا یہ ضائع شدہ وقت وہ وقت ہے جو وہ اپنے پیاروں کے ساتھ اچھی صحت کے ساتھ گزار سکتے ہیں۔

انہوں نے کہا کہ تمباکو نوشی زندگی کے آخری دور میں منفی نتائج نہیں دکھاتی بلکہ یہ زندگی کے پورے دورانیے میں صحت مند پہلوؤں کو ختم کرتی جاتی ہے۔

یہ تحقیق برطانیہ کے محکمہ صحت اور سماجی نگہداشت کی طرف سے شروع کی گئی تھی۔ اس میں برٹش ڈاکٹرز اسٹڈی سے مردوں کی اموات کا ڈیٹا اور ملین ویمن اسٹڈی سے خواتین کا ڈیٹا شامل ہے۔