نادیہ خان نے مودی حکومت کو آئینہ دکھادیا

لاہور : پاکستانی شوبز انڈسٹری کی معروف اور بیباک اداکارہ نادیہ خان کے بھارت کے خلاف دوٹوک موقف نے سوشل میڈیا صارفین کا دل جیت لیا۔

نادیہ خان ایک بار پھر خبروں کی زینت بن گئیں، لیکن اس بار وجہ کوئی ڈرامہ یا مارننگ شو نہیں بلکہ ان کا جرت مندانہ اور حب الوطنی سے بھرپور بیان ہے جس میں انہوں نے بھارت کے خلاف کھل کر آواز بلند کی۔

پہلگام واقعے پر نادیہ خان نے کہا کہ یہ سب بھارت کا جھوٹا ڈرامہ ہے تاکہ دنیا میں پاکستان کو بدنام کیا جا سکے۔اپنے ایک ویڈیو بیان میں نادیہ خان نے کہا کہ یہ بھارت کا ایک اور فالس فلیگ آپریشن ہے، اس کا مقصد کیا ہے؟

 پاکستان کے پانی کو روکنا، سندھ طاس معاہدے کے تحت جو حق ہمارا ہے وہ چھیننا، کبھی سوچا ہے کہ ہر بار جب کوئی اہم امریکی یا مغربی وفد بھارت کا دورہ کرتا ہے تو وہاں ایک ''دہشت گردی''کا واقعہ کیوں ہوتا ہے؟

سمجھوتہ ایکسپریس، ممبئی حملے، پہلگام واقعہ یہ سب بھارت کی سیاسی چالیں ہیں۔انہوں نے مزید کہا کہ ہم بیوقوف نہیں، دنیا بیوقوف نہیں، پاکستانی قوم جاگ چکی ہے اور ہر سازش کا جواب دے گی۔

نادیہ خان کی بیباکی نے نا صرف شائقین کے دل جیت لیے بلکہ سوشل میڈیا پر ان کے حق میں تبصروں کی بہار آ گئی۔ صارفین کا کہنا ہے کہ نادیہ خان نے دل جیت لیا۔