بھارت نے مزید پانی چھوڑ دیا، جلالپور میں اونچے درجے کا سیلاب، پاک فوج طلب

بھارت کی جانب سے سیلاب سے متعلق تازہ معلومات فراہم کرنے کے بعد پنجاب میں ہائی الرٹ جاری کر دیا گیا ہے۔

حکام نے بتایا ہے کہ بھارتی ہائی کمیشن کی جانب سے پاکستان کو مطلع کیا گیا ہے کہ دریائے ستلج میں پانی کی سطح میں مزید اضافہ ہو گا، جس کے باعث ہریکے اور فیروزپور کے علاقوں میں اونچے درجے کا سیلاب آ سکتا ہے۔

صورتحال کی سنگینی کے پیشِ نظر پنجاب ڈیزاسٹر مینجمنٹ اتھارٹی (پی ڈی ایم اے) نے مقامی انتظامیہ کو الرٹ جاری کرتے ہوئے شہریوں کی جان و مال کے تحفظ کو یقینی بنانے کی ہدایت کی ہے۔

دوسری جانب، جلال پور پیر والا میں سیلابی صورتحال خراب ہونے کے بعد پاک فوج کو امدادی کارروائیوں کے لیے طلب کر لیا گیا ہے۔ سیلاب سے نمٹنے اور متاثرہ افراد کو محفوظ مقامات پر منتقل کرنے کے لیے امدادی ٹیمیں کام کر رہی ہیں۔