عمر ایوب کے کزن جلسے سے گرفتار، بیٹے اور بھتیجے کی گرفتاری کی بھی کوشش

پاکستان تحریک انصاف کے جنرل سیکریٹری عمر ایوب نے دعویٰ کیا ہے کہ اُن کے کزن کو پولیس نے ہری پور میں جلسے کے دوران گرفتار کرلیا۔

عمر ایوب نے اپنے ایک بیان میں کہا کہ میرے بڑے کزن یوسف ایوب خان کو پشاور پولیس نے 3 ایم پی او کے تحت جلسہ کے دوران ہری پور سے گرفتار کیا ہے۔

انہوں نے بتایا کہ میرے کزن اور سابق وزیر کے پی پشاور ہائی کورٹ سے ضمانت پر ہیں۔ اُس کے باوجود پولیس نے انہیں  ایک جلسے سے گرفتار کیا جبکہ میرے چھوٹے بیٹے کو بھی گرفتار کرنے کی کوشش کی گئی۔

عمر ایوب نے کہا کہ پولیس نے میرے 18 سالہ بھتیجے کو گرفتار کرنے کیلیے اُس کا تعاقب کیا ہے۔ انہوں نے کہا کہ ان تمام غیر قانونی ہتھکنڈوں کی سخت ترین الفاظ میں مذمت کرتے ہیں، قانون اور جمہوریت کی آواز کو دبانے کے لیے انتخابات سے قبل پورے پاکستان میں پی ٹی آئی کو نشانہ بنایا جا رہا ہے۔

اپنے بیان میں پی ٹی آئی کے جنرل سیکریٹری نے کہا کہ ’ہم وزیراعظم عمران خان کے ساتھ تھے، ساتھ ہیں اور انکے ساتھ رہیں گے، آئی جی کے پی گنڈا پور کو شرم آنی چاہیے، انہیں یہ دور ختم ہونے کے بعد ہمارا سامنا کرنا پڑے گا۔