عمران خان کی رہائی کیلیے اٹھنے والی بیرونی آوازوں پر پی ٹی آئی کے درمیان تقسیم

بانی پی ٹی آئی کیلیے اٹھنے والی بیرونی آوازوں پر تحریک انصاف تقسیم ہوگئی ہے اور اب رہنما وضاحتیں دینے پر مجبور ہیں۔

پاکستان تحریک انصاف کے رہنما اور اپوزیشن لیڈر قومی اسمبلی عمر ایوب نے کہا ہے کہ بانی چیئرمین پاکستان تحریک انصاف (پی ٹی آئی) سیاسی قیدی ہیں۔

اپنے بیان میں عمر ایوب نے کہا کہ بانی پی ٹی آئی کی رہائی کے لیے اٹھنے والی ہر آواز کو خوش آمدید کہتے ہیں کیونکہ بانی چیئرمین سیاسی قیدی ہیں۔

انہوں نے کہا کہ بانی پی ٹی آئی کو غیر قانونی طور پر سیاسی مقدمات کے تحت گرفتار کر رکھا ہے اور وہ سیاسی قیدی ہیں۔

اس سے قبل چیئرمین پاکستان تحریک انصاف (پی ٹی آئی) بیرسٹر گوہر نے کہا تھا کہ امریکا سمیت کسی بھی ملک کی مدد کے خواہشمند نہیں ہیں۔

دوسری طرف پی ٹی آئی ترجمان شیخ وقاص اکرم نے کہا کہ اگر انسانی حقوق پر کوئی بیان دیتا ہے تو اسے خوش آمدید کہتے ہیں۔