بلوچستان میں تھانے پر حملہ، لیویز کے نائب رسالدار اور دس اہلکار برطرف

بلوچستان کے علاقے ہوشاب میں تھانے پر حملے کی تحقیقات میں بڑی پیشرفت سامنے آئی اور غفلت برتنے پر نائب رسالدار سمیت لیویز کے 10 اہلکاروں کو ملازمت سے برطرف کردیا گیا ہے۔

تفصیلات کے مطابق بلوچستان کے علاقے کیچ میں قائم لیویز تھانہ ہوشاب پر دہشت گردوں نے بھرپور حملہ کیا تاہم اس میں کوئی جانی نقصان نہیں ہوا۔

حملے کی تحقیقات کا آغاز کرتے ہوئے ابتدائی مرحلے میں غفلت برتنے پر لیویز کے نائب رسالدار سمیت دس اہلکاروں کو نوکری سے برطرف کردیا گیا ہے۔

ڈپٹی کمشنر کیچ اسماعیل ابراہیم نے بتایا کہ حملے میں ملوث ملزمان کی گرفتاری کیلئے سرچ آپریشن کیا جارہا ہے جبکہ اس حوالے سے قبائلی عمائدین سے بھی رابطے میں ہیں۔ انہوں نے یقین دہانی کرائی کہ ملزمان کو جلد کیفر کردار تک پہنچایا جائے گا۔