بلے کا انتخابی نشان کیس، سپریم کورٹ نے فیصلہ سنادیا

سپریم کورٹ آف پاکستان نے پشاور ہائیکورٹ کے فیصلے کے خلاف الیکشن کمیشن آف پاکستان کی اپیل کو منظور کرتے ہوئے تحریک انصاف سے بلے کا نشان واپس لے لیا۔

الیکشن کمیشن آف پاکستان کی پشاور ہائیکورٹ کے فیصلے کے خلاف دائر درخواست پر چیف جسٹس آف پاکستان کی سربراہی میں تین رکنی بینچ نے سماعت کی۔ بینچ میں جسٹس مظہر اور جسٹس مسرت ہلالی شامل تھیں۔

سپریم کورٹ میں الیکشن کمیشن کی درخواست پر کئی گھنٹے طویل سماعت ہوئی، جسے براہ راست سپریم کورٹ کے یوٹیوب چینل پر نشر کیا گیا۔

اس دوران الیکشن کمیشن کے وکیل، پی ٹی آئی کے وکلا، بانی رکن اکبر ایس بابر، حامد خان سمیت دیگر وکلا نے دلائل دیے جس کے دوران عدالت میں گرما گرمی بھی دیکھنے میں آئی۔

بعد ازاں عدالت نے فیصلہ محفوظ کیا جسے ساڑھے نو بجے سنایا جانا تھا تاہم سپریم کورٹ نے دو گھنٹے تاخیر سے فیصلہ جاری کیا۔

سپریم کورٹ نے الیکشن کمیشن کی پشاور ہائیکورٹ کیخلاف دائر درخواست کو منظور کرتے ہوئے پشاور ہائیکورٹ کے فیصلے کو کالعدم قرار دیا اور تحریک انصاف سے بلے کا انتخابی نشان واپس لے لیا۔