بانی پی ٹی آئی سب کو معاف کرنے کیلیے تیار، مذاکرات کی ڈیڈ لائن 31 جنوری 2025 ہے، پی ٹی آئی

پاکستان تحریک انصاف کی مذاکراتی کمیٹی کے ترجمان اور سنی اتحاد کونسل کے سربراہ صاحبزادہ حامد رضا نے کہا ہے کہ مینڈیٹ کی واپسی تک کال جاری رہے گی جبکہ بانی پی ٹی آئی سب کو معاف کرنے کیلیے تیار ہیں۔

اڈیالہ جیل میں عمران خان سے مذاکرات کے بعد میڈیا سے گفتگو کرتے ہوئے صاحبزادہ حامد رضا نے کہا کہ 

آج مذاکراتی کمیٹی کی عمر ایوب کی سربرہی میں بانی پی ٹی آئی سے ملاقات ہوئی، بانی پی ٹی آئی نے  کہا کہ زرمبادلہ پاکستان نہ بھیجنے کی کال جاری رہے گی۔

انہوں نے کہا کہ 1971 کے بعد کسی پارٹی کے حقوق چھینے گئے، سول رائٹس اور ہیومن رائٹس کو معطل کیا گیا، الیکشن میں ہمارا مینڈیٹ چرایا گیا یہ اس لیے کال جاری رہے گی۔ اُن کا کہنا تھا کہ ہم مذاکرات کو 31 جنوری 2025 کو منطقی انجام تک پہنچانا چاہتے ہیں، عمر ایوب ڈیڈ لائن سے متعلق حکومت کو باضابطہ آگاہ کریں گے۔

صاحبزادہ حامد رضا نے کہا کہ بانی پی ٹی آئی نے تمام مظالم کو معاف کرنے کی حامی بھر لی ہے جبکہ انھوں نے وزیراعلی کے پی پر بھرپور اعتماد کا اظہار کیا ہے اور فسطائیت کا سامنا کرنے والے تمام پارلیمنٹرین اور کارکنوں کو اپنا فخر کہا ہے اور کرم  کے معاملے پر بانی پی ٹی آئی نے فوری حل کرنے کا کہا ہے۔

مذاکراتی کمیٹی کے ترجمان نے کہا کہ ہمارے مطالبات دو ہیں، پہلا دو مئی کی جوڈیشل تحقیقات ہیں، جس کا کمیشن بنا کر سینئر ترین ججز سے اس معاملے کی تحقیقات کرائی جائیں، سی سی ٹی وی فوٹیجز سامنے لائی جائیں جو لوگوں کو اکسا رہے تھے ان کا تعین ہوسکے۔

انہوں نے کہا کہ 26 نومبر پر ہمارا موقف ہے گولی چلی، 13 شہید ہیں، 64 زخمی ہیں، ڈی چوک پر جو کچھ ہوا وہ پاکستان کی جمہوریت پر حملہ ہے،ہم 26 نومبر پر بھی جوڈیشل کمیشن کا مطالبہ کررہے ہیں۔

صاحبزادہ حامد رضا نے کہا کہ ہمارا دوسرا مطالبہ مختلف جیلوں میں ہمارے لوگ ہیں ان کو رہا کیا جائے اور ان کی رہائی ہمارا ایجنڈا ہے جبکہ آخر میں بانی پی ٹی آئی کی رہائی کا معاملہ ہے۔

انہوں نے کہا کہ بانی پی ٹی آئی کی رہائی کسی ڈیل پر نہیں عدالتوں سے ہوگی، ہم نے پیغام دیا ہے بانی پی ٹی آئی کی رہائی ہمارے ایجنڈے کا حصہ ہے، آئینی قانونی اور عدالتی طریقے سے رہا ہوں، پہلے بھی بانی پی ٹی آئی کی رہائی ہونی تھی لیکن ایک اور مقدمے میں گرفتار کرلیا گیا۔

سنی اتحاد کونسل کے سربراہ نے کہا کہ افغانستان پر حملے پر بانی پی ٹی آئی نے کہا ہم کسی پرائی جنگ کا حصہ نہیں بن سکتے، بانی پی ٹی آئی نے افغانستان حملے کی مذمت کی اور افغانستان سے تمام تنازعات بات چیت کے تحت حل کرنے پر زور دیا ہے کیونکہ افغانستان ہمارا برادر ملک ہے۔

ایک سوال کے جواب میں انہوں نے واضح کیا کہ اب 2 جنوری کو  حکومت سے مذاکرات ہوں گے اور تمام مطالبات حکومت کے سامنے رکھیں گے۔