حکومت نے پاکستانی عازمین حج کو خوش خبری سنادی

 وزارت مذہبی امور نے سرکاری حج اسکیم کے لیے درخواستیں جمع کروانے کی تاریخ میں دس روز توسیع کردی۔

وزارت مذہبی امور و بین مذاہب ہم آہنگی کی جانب سے جاری اعلامیے میں کہا گیا ہے کہ عازمین کے اصرار پر سرکاری حج اسکیم کے تحت درخواستوں کی وصولی کی آخری تاریخ 22 دسمبر مقرر کی گئی ہے۔

وزارت مذہبی امور کے ترجمان نے کہا کہ اسپانسرشپ سکیم میں پہلے آئیے پہلے پائیے کی بنیاد پر درخواستیں وصول کی جا رہی ہیں، بیرون ملک سے  ڈالرز میں ادائیگی کرنے والے بلا قرعہ اندازی کامیاب  کیے جائیں گے۔

انہوں نے کہا کہ عازمینِ حج کے اصرار پر وزارتِ مذہبی امور نے حجِ بدل پر پانچ سالہ پابندی ختم کر دی، گزشتہ پانچ سال کے دوران حج کرنے والے امسال  حج درخواست دینے کے اہل قرار ہیں۔

اعلامیے میں کہا گیا ہے کہ اکیلی خواتین حلف نامہ  فراہم کرنے پر قابل اعتماد خواتین کے گروپ میں حج کر سکیں گی۔