گاڑیوں کی پکڑ دھکڑ کیخلاف گڈز ٹرانسپورٹ کی ہڑتال ختم

گڈز ٹرانسپورٹرز اور کمشنر کراچی میں مذاکرات کامیاب ہونے کے بعد ٹرانسپورٹرز نے ہڑتال ختم کر دی ہے۔

  گڈز ٹرانسپورٹرز رہنما امداد نقوی نے کہا ہے کہ 3 سے 6 ماہ میں ڈمپرز اور ٹینکرز سمیت تمام بڑی گاڑیوں کی فٹنس مکمل کی جائے گی، حکومت کی یکم مئی کی ڈیڈ لائن ناقابلِ عمل تھی۔

ہیوی گاڑیوں میں ایک کیمرا فرنٹ، ایک بیک اور ایک اندر لگے گا۔ ٹائروں کے ساتھ سیفٹی گارڈز بھی لگیں گے تاکہ کوئی نیچے نہ آ سکے، ہیوی گاڑیوں میں اب ٹریکر لگیں گے، جس کی ریکارڈنگ ڈی آئی جی ٹریفک کے دفتر میں ہو گی۔ 

انہوں نے کہا کہ فٹنس اور حفاظتی اقدامات پر پیش رفت رپورٹ ہر 10 دن بعد کمشنر اور ڈی آئی جی کو پیش کی جائے گی۔

واضح رہے کہ کراچی میں ٹریفک حادثات کی روک تھام کیلیے انتظامیہ نے سخت فیصلے کیے ہیں جن پر عملدرآمد بھی جاری ہے، 8 روز میں ٹریفک قوانین کی خلاف ورزیوں پر 1 ارب 25 کروڑ روپے مالیت کے جرمانے کیے ہیں۔