کراچی: نیو ایئر کے موقع پر ڈیفنس کے رہائشیوں اور دیگر کیلئے ٹریفک پلان کا اعلان

کراچی : نئے سال 2024 کی آمد کے موقع پر کراچی کے علاقے ڈیفنس ہاوسنگ اتھارٹی (ڈی ایچ اے)کے رہائشی و دیگر افراد کیلئے ٹریفک پلان سامنے آگیا۔

ذرائع کے مطابق ٹریفک پولیس کا اس حوالے سے کہنا ہے کہ متبادل راستوں والے علاقوں کے رہائشی اپنا اصل شناختی کارڈ دکھا کر جاسکیں گے۔

حکام کے مطابق اختر کالونی سے براستہ خیابان اتحاد سی ویو کا روڈ بند ہوگا، سی ویو یا اس کے اطراف جانے والے افراد 26 اسٹریٹ سے ہوتے ہوئے جاسکیں گے۔

ٹریفک پولیس کے مطابق اسی طرح دو تلوار سے عبداللہ شاہ غازی مزار جانے والی سڑک ٹریفک کیلیے بند ہوگی۔ عبداللہ شاہ غازی کے مزار سے 26 اسٹریٹ جانے والی سڑک بھی بند ہوگی۔

حکام کے مطابق ماڑی پور روڈ سے براستہ جناح برج مائی کولاچی ہیوی ٹریفک کو اجازت نہیں ہوگی۔

اسی طرح ڈاکٹر ضیاالدین روڈ لکی سگنل تک ٹریفک کیلیے بند ہوگا جبکہ پی آئی ڈی سی چوک سے کلب روڈ بھی ٹریفک کیلئے بند ہوگا۔

ٹریفک پولیس حکام کے مطابق بغیر سائیلنسر کی گاڑیوں اور موٹر سائیکلوں کے خلاف کارروائی ہوگی۔ غیرذمہ داری سے گاڑی اور موٹرسائیکل چلانے والوں کے خلاف سخت قانونی کارروائی عمل میں لائی جائے گی۔