کراچی سمیت ملک بھر میں عید الفطر پر بارش کا امکان

محکمہ موسمیات نے پیش گوئی کی ہے کہ عید الفطر پر کراچی سمیت ملک کے مختلف شہروں میں بارش کا امکان ہے۔

محکمہ موسمیات ارلی وارننگ سینٹر کی جانب سے جاری پیش گوئی کے مطابق ملک میں مغرب کی جانب سے یکے بعد دیگرے دوسسٹم داخل ہوں گے۔

پیش گوئی کے مطابق مغربی ہواؤں کا پہلا نیا سلسلہ 10اپریل کو ملک میں داخل ہوگا جبکہ دوسرا مغربی سلسلہ 12اپریل کو داخل ہوگا جو 15اپریل تک برقراررہےگا۔

محکمہ موسمیات  کے مطابق  دوسرے مغربی سلسلے کے تحت 13 اور14اپریل کوکراچی میں گرج چمک کے ساتھ بارش کا امکان ہے، اس دوران شہرمیں آندھی اورہواؤں کےجھکڑبھی چل سکتے ہیں۔

اس سے قبل ملک کے مختلف میدانی علاقے سسٹم کی لپیٹ میں رہیں گے جس کے باعث بارش ہوسکتی ہے جبکہ پہاڑی علاقوں میں برفباری کا بھی امکان ہے۔

ارلی وارننگ سینٹر نے اگلے2سے3روزکے دوران صوبہ سندھ کے بیشترعلاقوں میں موسم گرم رہنے کا امکان ظاہر کیا ہے، اس دوران کہیں پر درجہ حرارت 42 ڈگری اور کہیں 39 ڈگری ریکارڈ ہوسکتا ہے۔