کشمیریوں کی دلیرانہ جدوجہد کا مقدر آزادی ہے، مسلح افواج

پاکستان کی مسلح افواج  نے پانچ فروری کو کشمیر کے لوگوں سے اظہار یکجہتی کرتے ہوئے اُن کی جدوجہد کو خراج تحسین پیش کیا ہے۔

پاک فوج کے شعبہ تعلقات عامہ کی جانب سے جاری اعلامیہ میں کہا گیا ہے کہ سی جے سی ایس ایس سی اور سروسز چیفس نے بھارتی قابض افواج کی جانب سے نافذ کیے جانے والے اقدامات کیخلاف پُرعزم جدودجہد کرنے والے کشمیریوں کو شاندار الفاظ میں خراج تحسین پیش کیا۔

مسلح افواج کے سربراہان اور سروسز چیفس نے کہا کہ مقبوضہ کشمیر میں مسلسل انسانی حقوق کی سنگین خلاف ورزیاں اور غیر انسانی لاک ڈاؤن نافذ کیا گیا ہے۔

مسلح افواج نے زورد دیا کہ کشمیر 1948 سے اقوام متحدہ کے ایجنڈے پر ایک طویل عرصے سے زیر التوا حل طلب مسئلہ ہے۔ مسئلہ کشمیر کے عوام کی امنگوں کے مطابق اور اقوام متحدہ کی قراردادوں کے مطابق ان کے حق خودارادیت کے لیے حل ہونا چاہیے۔

اعلامیے میں کہا گیا ہے کہ بھارتی قابض افواج کے کئی دہائیوں سے جاری مظالم کشمیری عوام اور ان کی جائز جدوجہد آزادی کے جذبے کو کم کرنے میں ناکام رہے ہیں، رات درحقیقت طلوع ہونے سے پہلے کی تاریک ترین ہے، انشاء اللہ بہادرانہ جدوجہد کا مقدر آزادی ہے۔