مذاکرات میں ناکامی پر افغانستان سے کھلی جنگ ہے، خواجہ آصف

وفاقی وزیر دفاع خواجہ آصف نے کہا ہے کہ اگر افغان طالبان حکومت کے ساتھ مذاکرات سے معاملات طے نہ ہوئے تو پاکستان کھلی جنگ کے آپشن پر بھی غور کر سکتا ہے۔

سیالکوٹ میں ایک تقریب سے خطاب کرتے ہوئے خواجہ آصف نے کہا کہ پاکستان نے ماضی میں بھارت کو شکست دی، جس کے بعد مودی حکومت نے افغانستان کے راستے پاکستان کے خلاف پراکسی جنگ شروع کی۔

انہوں نے کہا کہ پاکستان نے چار دہائیوں تک افغان مہاجرین کی میزبانی کی، لیکن اس کے بدلے ہمیں سرحد پار سے تخریب کاری کا سامنا کرنا پڑا۔

وزیر دفاع نے مزید بتایا کہ گزشتہ پانچ روز سے پاک افغان سرحد پر کوئی بڑا واقعہ پیش نہیں آیا، اور یہ ہماری افواج کی قربانیوں کا نتیجہ ہے کہ آج سرحدیں محفوظ ہیں۔

خواجہ آصف کا کہنا تھا کہ افغانستان کی جانب سے پیش کی گئی شرائط کا جائزہ لیا جا رہا ہے، اگر وہ پاکستان کے مفاد میں ہوئیں تو معاہدہ ممکن ہے، ورنہ ہم ہر آپشن کے لیے تیار ہیں۔