نواز شریف نے سیاست سے کنارہ کشی کرلی؟ نئی حکومت میں کردار سے متعلق مریم نواز کا بڑا بیان

مسلم لیگ (ن) کی سینئر نائب صدر مریم نواز نے پارٹی کے قائد نواز شریف کے سیاست سے کنارہ کشی اختیار کرنے کے دعوؤں کی تردید کرتے ہوئے کہا ہے کہ وہ وفاق اور پنجاب میں پارٹی کی حکومتوں کی نگرانی کریں گی۔

 مائیکروبلاگنگ سائٹ ایکس پر مسلم لیگ ن کی چیف آرگنائزر نے لکھا کہ ’’اگر یہ سمجھا جا رہا ہے کہ نواز شریف وزارت عظمیٰ کا عہدہ قبول نہ کر کے سیاست سے دور رہ رہے ہیں تو یہ مفروضہ درست نہیں ہے۔‘‘

 انہوں نے مزید کہا کہ "اگلے پانچ سالوں میں، نواز شریف نہ صرف فعال سیاست میں حصہ لیں گے بلکہ مرکز اور پنجاب میں اپنی حکومتوں کی نگرانی بھی کریں گے۔"

 مریم نواز نے کہا کہ نواز شریف اپنی انتخابی تقاریر میں پہلے ہی واضح کر چکے ہیں کہ وہ 'کسی مخلوط حکومت کا حصہ نہیں بنیں گے'۔

 "شہباز شریف اور میں ان کے [نواز] سپاہی ہیں، ان کی ہدایات کے پابند ہیں، اور ان کی قیادت اور نگرانی میں کام کریں گے - اللہ ہمیں کامیابی عطا فرمائے۔ آمین''۔