پی ٹی آئی کے جلسے میں اسٹیج پر آؤ تو کپڑے پھٹ جاتے اور جیبیں کٹ جاتی ہیں، محمود خان اچکزئی

تحریک تحفظ آئین گرینڈ اپوزیشن اتحاد کے سربراہ محمود خان اچکزئی نے پی ٹی آئی میں موجود نظم و ضبط کی شدید کمی کی طرف اشارہ دیتے ہوئے کہا ہے کہ ایسے لوگ انقلاب نہیں لاسکتے۔

اسلام آباد میں سنگجانی کے مقام پر محمود خان اچکزئی نے کہا کہ تحریک انصاف میں تنظیم کی بہت زیادہ کمی ہے، جلسے میں اسٹیج پر آؤ تو کپڑے پھٹ جاتے جبکہ جیب کٹ جاتی ہے۔

اُن کا کہنا تھا کہ  انقلاب کیلئے بنیادی شرط تنظیم ہوتی ہے، پی ٹی آئی کے کارکنوں کی بانی پی ٹی آئی سے محبت اپنی جگہ لیکن تنظیم کی کمی نظر آرہی ہے۔ آپ جب اسٹیج پر چڑھتے ہیں تو کپڑے پھٹ جاتے ہیں جیبیں کٹ جاتی ہیں، ایسا مجمع انقلاب نہیں لاسکتا۔ 

محمود خان اچکزئی کاکہناتھا کہ پاکستان میں انقلاب ووٹ کے ذریعے آچکا ہے، موجودہ حکومت بے ایمانی سے اقتدار میں آئی ہے۔ انہوں نے پی ٹی آئی سے کہا کہ حکومت کو دس پندرہ دن دیں اورکہیں کہ بانی پی ٹی آئی اور تمام لیڈروں کورہاکریں، ورنہ ہر ضلع میں تحریک چلائی جائے۔